વીજળી દ્વારા દૂર વાત કરવાનું સાધન કે તે દ્વારા કરાતી વાત; દૂરભાષ

અવાજથી સંદેશો કહેનાર તારનું યંત્ર; બોલેલા બોલ ઘણે દૂર સાંભળી શકાય એવું યંત્ર; અંતર્શ્રવણ યંત્ર; એક જગ્યાએથી કહેલા શબ્દો કેટલા યે ગાઉ દૂર બીજે સ્થળે સંભળાય તેવો તાર; વીજળી દ્વારા વાત કરવાનું યંત્ર; શ્રવણયંત્ર; સ્વરવાહક યંત્ર; સંદેશાવાહક યંત્ર; એક છેડા ઉપર બોલેલું બીજા છેડા ઉપર સંભળાય એવું યંત્ર. આનો શોધક ગ્રેહામ બેલ મનાય છે. જેમ અવાજનાં આંદોલનો કોઈ ચીજ ઉપર પડે ત્યારે તે હાલે છે, તેમ જો આપણે કોઈ પણ ચીજને હલાવીએ તો અવાજનાં આંદોલનો હવામાં ઉત્પન્ન થાય છે. ટેલિફોનની ભૂંગળીની અંદર બોલવાથી માંહેની પતરી હાલે છે ને તેનાં આંદોલન વડે સામા માણસે કાને રાખેલ ભૂંગળી માંહેની પતરી હાલે છે. ત્યારે ત્યાંથી હવામાં મૂળ જેવાંજ અવાજનાં આંદલનો નીકળે છે. મતલબ કે ટેલિફોનમાં અવાજ તાર વાટે એક ઠેકાણેથી બીજે ઠેકાણે મોકલાતો નથી, પણ અવાજથી વિદ્યુતશક્તિના વહેણમાં ફેરફાર કરી, તે ફેરફારોથી જ્યાં અવાજ મોકલવો હોય ત્યાં ફરીથી તેવો જ અવાજ ઉત્પન્ન કરવામાં આવે છે; ત્યારે રેડિયામાં તો મૂળ અવાજને જ આકર્ષી સાંભળવામાં આવે છે. ઓગણીસમા સૈકાના છેલ્લા ભાગમાં આ યંત્ર સંપૂર્ણતાએ પહોંચી લોકોના ઉપયોગમાં આવવા લાગ્યું. હાલ દુનિયાનાં મોટાં શહેરોમાં ઘેર ઘેર તે ચાલુ થઈ ગયું છે.

લાંબા અંતરેથી તારના દોરડાની મદદ વડે થતી બોલાતા શબ્દોની લેવડદેવડ; સ્વરવાહક યંત્રથી મોકલાતો સંદેશો.